Мэндчилгээ

 

Бидний цахим хуудсанд саатан буй таны амгаланг айлтгая!

“ШУТИС-КООСЭН” технологийн коллеж нь байгалийн шинжлэх ухааны суурь мэдлэгтэй, инженер, техник, технологи сонирхдог зохион бүтээх авьяастай 9-р анги төгссөн сурагчдыг элсүүлэн  цахилгаан, барилга, механик инженерийн чиглэлээр суралцуулдаг.

Манай хамт олон Япон улсын үйлдвэрлэл, технологийн өндөр хөгжилд үлэмж их нөлөө үзүүлсэн  “Коосэн сургалтын систем”-ийг өөрийн онцлог, нөхцөлд нийцүүлэн нутагшуулан суралцагчдад инженер, технологийн мэргэжлийн онцлогийг  таниулж Их сургууль, Коосэн сургуулийн залгамж холбоог хөгжүүлэн хөрвөх чадвар бүхий бүтээлч сэтгэлгээтэй, чадварлаг инженерүүдыг бэлтгэх шаталсан тогтолцоог бүрдүүлэн  Олон улсын боловсролын чиг хандлагад нийцсэн сургалтын хөтөлбөрийг хэрэгжүүлэх зорилготой ажиллаж байна. 

Өнөөгийн Япон улсын  үйлдвэрлэл, технологийн өндөр хөгжилд Коосэн сургалтын систем нь үлэмж их нөлөөлсөн юм. Олон улсын боловсролын чиг хандлагад нийцсэн сургалтын хөтөлбөрөөр Коосэн сургалтын системийг “нутагшуулан”, их сургууль, коосэн сургуулийн залгамж холбоог хөгжүүлэн ажиллаж байна. Манай хамт олон инженер технологийн мэргэжлийн онцлогийг суралцагчдадаа таниулж, хөрвөх чадвартай, бүтээлч сэтгэлгээтэй инженер бэлтгэх зорилготой сургалтын үйл ажиллагааг явуулж байна.

Энэхүү эрхэм зорилгыг хэрэгжүүлэхийн тулд сургалтын хөтөлбөрөө шинэчлэх, суралцагчдыг бие даан бүтээлчээр суралцахуйд сургах, төсөлд суурилсан сургалтыг туршин , багшлах боловсон хүчнийхээ чадвар, мэргэжил дээшлүүлэх гэх зэрэг томоохон зорилтуудыг дэвшүүлэн ажиллаж байна.

“ШУТИС-Коосэн” Технологийн Коллежийн 15-17 настай сурагчид 2018 оноос “ABU робокон” үндэсний роботын аварга шалгаруулах тэмцээнд жил дараалан оролцож, Монгол улсын бакалаврын хөтөлбөрөөр суралцдаг 18-аас 25 настай оюутнуудтай өрсөлдөн тусгай байрт шалгарч “Онцлох баг”, “Шилдэг шийдэлтэй баг”-аар тодрон үзэгч, оролцогчдын “өхөөрдлийг” татаж байлаа.

“ШУТИС-Коосэн” Технологийн Коллежийг инженерийн мэргэжлийн дипломтой төгсөгчдөөс 2018-2019 онд 24,  2019-2020 онд 24 оюутан төгсөж нийт 48 төгсөгчөөс 30 төгсөгч маань ШУТИС-д үзэн судалсан хичээлүүдээ дүйцүүлэн тооцуулж, ШУТИС-ийн бакалаврын хөтөлбөрөөр элсэлтийн шалгалтгүй үргэлжлүүлэн суралцаж, 5 төгсөгч мэргэжлийн чиглэлээр ажиллаж байна.  Япон улсын их сургуульд ахисан төвшинд 4 төгсөгчид суралцаж, 8 төгсөгчид амжилттайгаар ажил эрхэлж байгааг дурдахад таатай байна.    

Бидний үйл ажиллагааг дэмжин хамтран ажилладаг байгууллага, сургууль, хамт олон, эцэг эх, суралцагч, элсэгчид та бүхэнд “ШУТИС-КООСЭН” Технологийн Коллежийн үүд хаалга үргэлж нээлттэй байх болно.

Андын ёсыг эрхэмлэж, эвсэг, тусархаг, ажилсаг, нүүрэндээ галтай, нүдэндээ цогтой шантаршгүй монгол иргэдийг бид бэлтгэх болно.

Та бүхэнд хамт олныхоо нэрийн өмнөөс чин сэтгэлийн мэндчилгээ дэвшүүлье!
 

Хүндэтгэсэн
ШУТИС-КООСЭН технологийн коллежийн 
захирал  
Д.Болдбаатар